Gegeh Kiniteken

         Goliat, Panglima Pilistin, erperang alu ngasamken gegehna saja. Dagingna si mbelin mbestang erbajuken ras ertopiken besi, tahan takil tah ilembing. Daud si umurna nguda denga, la erpengalamen ibas perang. Alu make paken permakan saja Daud ngelawan Goliat alu maba 5 ngkibul batu rikut kalimbawang. Tapi la keberadanna e penalemenna tapi gegeh kinitekenna asamna banci naluken musuhna e. Batu kalimbawangna e melesit ndempar perdempaken Goliat si sitikkal ngenca terbuka e seh limberen Goliat dingen guling. I jem Daud ndungi kegeluhen ras kembisaan Goliat nggeleh kerahungna alu pedangna sendiri.

         Tapi labo erkiteken naluken musuh ukurta meriah ntah meganjang. Ermeriah erkiteken gelarndu enggo isuratken (Oge: Luk. 10:17-20). Ertina kam enggo ipake Dibata.

         Ula mbiar, sebab Dibata tetap ngkelini kita (oge: Jesaya 43:1-7). Gegeh kinitekenta mabai kita sue bagi isuruh Dibata. Kemenangen me si kerajangta erkiteken makeken senjata gegeh kiniteken.

         Nen Goliat, nen Namrud ibas Pustaka. Kuga hebatna Hitler, tentera Jepang paksa PD.II. Nen G.30 S/PKI, Komunisme internasional. kerina e erpenalemken gegehna saja, jadina kerina lenyap la nai erbeteh.

         Tangkas dage man banta, kita kalak Kristen lit senjatanta si ampuh. Ngasup naluken kalak si megombang man Dibata. Alu gegeh kinitekenta nge ngerintak ku kebenaren Tuhan. Mpersada kita sikeleng-kelengen.

         Si nggeluhken geluhna alu gegeh kiniteken, ipake Dibata guna kemulianNa. Sangap me kam. Amin.

Pertoton                  :     Tuhan pakekenlah kami guna kemuliaNdu. Amin

Pokok Pikiren        :     Gegeh kiniteken naruhken kegeluhenta ku kemalamen ate.

Doa Syafat             :     Kalak si tertindas erkiteken kiniteken.

                                                                                                            Y. Sinuraya

sumber:http://maranatha.gbkp.or.id/